Hertz und sinne muege dich

Hertz vnd sinne muege dich
das ich mit worten minnenklich
gelob die userwelten meit
von der ùns gnade flùsset.

Ir lob ist alles lobs ein tach
ir lob kein munt nie vol gesprach
und wirt ouch niemer me volseit
ir lob als lob beschlusset.
Was leygen phaffen ir ze lobe singet
dar ob ir lob hoch in den lùften klinget.

Wer koend si noch volloben gar
si treit ob aller engel schar
der froeide fruchteberndes ris
da ùns genade bringet.

Des lopt dich magt der engel sang,
din minne schuof das sich got swang
drivaltenklich uf reine vart
zuo dir in warer minne.

Er wart din sun, der dich geschuof,
des lopt dich manger zungen ruof
du ital gottes tochter zart,
Maria kùneginne.

Du werd ie gottes hoechste arch so here,
darin er siner froeden schatz wolt meren.

Sid du nu tochter und muoter bist,
so bitt fùr ùns den waren Christ,
Das er ùns tue genaden schin,
das wir von sùnden keren.

Anonymus, Codex Engelberg 314